దేవాధిదేవా శ్రీ వాసుదేవా

దేవాధిదేవా శ్రీ వాసుదేవా
కావుమయ్య నన్ను కరుణాలవాల ||దేవా||

ఈ వేళనా ఆరు శత్రులను
నీవే పారద్రోలి నిజభక్తుజేసి ||దేవా||

నే జేసిన పుణ్యఫలమొ
నా పూర్వజుల పుణ్యఫలమొ
శ్రీ జానకీశ ఈ జన్మమిచ్చి
నన్ను ధన్యునిగ భువి జేర్చితివి ||దేవా||

భజన చేసే విధము దెలియండి…

భజన చేసే విధము దెలియండి, జనులార మీరు
నిజము కనుగొని మోదమందండి ||భజన||

భజన చేసే విధము దెలియక
నిజముగా హరిభక్తు లనుకొని
మదగజము దెగవ్రేయ లేకను
సుజనులని దిరుగంగ నేలను ||భజన||

జ్ఞానులనుకొని యెగసి పడకండీ
జనులార తత్వజ్ఞానమందే మనసు నిలపండీ
జ్ఞానులనుకొని యెగసిపడి
అజ్ఞానములు పైబెట్టుకొన్నను
మానసంబున బుట్టి చచ్చియు
పూని మరి జన్మింపవలయును ||భజన||

వారు వీరని యెంచబోకండి
జనులార మీరు నోరుచచ్చినవారు కాకండి
వారు వీరని యెంచుటెల్లను
సారము లేనట్టి హీనత
పౌరుషులకే గాక పుణ్యము
ఊరి కథలం దేమి యున్నది ||భజన||

ధరణి శ్రీ నరహరిని గొలువండి
జనులార మీరు
పరమపదవి బొంద గోరండి
ధరను శ్రీఘటికాద్రి నరహరి
పరమభక్తవరుల మనుకొని
విరివిగా నరసింహదాసుని
వరకవిత్వము సార మనుకొని ||భజన||